Habari za Jimbo la Kigoma
Habari kamili za matukio, sherehe na mafundisho yaliyojiri na yanayojiri katika Jimbo Katoliki la Kigoma.
DOMENIKA YA 21 A
Tushirikishane Ukarimu wa Bwana
Umimi ni ugonjwa ambao unamsumbua sana mwanadamu. Kila mmoja anafanya juhudi katika kazi yake ili kuhakikisha anapata zaidi ya mwingine. Ugonjwa huu hutujengea chuki kiasi cha kutofurahi kumwona mwingine anapata. Tupo katika jamii ambayo hakuna anayesikiliza kilio cha Lazaro anayeteseka pembeni yangu. Tupo katika jamii ambayo tunahalalisha kuwa aliyepata kapata kwa sababu ya juhudi zake na ataendelea kupata zaidi, na aliyekosa amekosa na ataendelea kusota katika kukosa kwake kwani yote ni uzembe wake. Ukristo wetu umetuvisha Kristo na hivyo tunapaswa kumuonesha wakati wowote.
Mungu anajionesha kupitia kinywa cha Nabii Isaya kwamba anapatikana wakati wowote, na yupo hivyo hivyo katika upendo wake wakati wowote. Hivyo tusikate tamaa na tumtafute Mungu. Tumwendee daima na mioyo ya toba. Wakati mwingine tunasongwa sana na mzigo wa dhambi na kufikiri kwamba kwa Mungu hakuna tena msamaha, hakuna tena fursa ya kurudi kwake. Yeyote anayemtafuta atampata wakati wowote na haja ya moyo wake itatimizwa. Uwe umeitwa kwake saa tatu au saa kumi na moja, wote kwa Mungu ni wenye thamani.
Hata kama sisi tunamkataa au hatujisumbui kumtafuta, Yeye anaangalia daima haja ya mioyo yetu na kutupatia ukarimu wake mithili ya Baba Mwenye Huruma (Lk 15:20). Tusipime kwa kuangalia yule kapata nini na kwa nini zaidi au pungufu yangu, bali tuangalie kwamba yule kapata kilicho cha muhimu katika kujikimu kwa maisha. Wakati mwingine tunawanyooshea vidole hao wenye kamba fupi, wakati sisi ndiyo tuliupunguza urefu wa kamba zao.
Yanakuwa ni maisha ya "mwenye kupata apate na mwenye kukosa akose". Tungo moja ya nyimbo za dini inasema: "Mungu alivyo ndivyo hivyo alivyo: mchana ni yule yule, usiku ni yule yule." Sisi wanadamu ndiyo tunaobadilika na kutoa au kupima kwa kulinganisha.
Baba Mtakatifu anatuonya katika hili anapotuambia: "Tunaweza vipi kuhalalisha kwamba tukio la wazee walioachwa katika hali duni kufa si habari nzito lakini nukta moja la soko la hisa inaposhuka inakuwa ni habari kuu? Huu ni unyanyapaa. Tunaweza kuendelea kuvumilia kuona chakula kinatupwa wakati watu wengine wanakufa kwa njaa..." (Furaha ya Injili).
Leo hii kila kitu kipo katika mashindano, mwenye nguvu mpishe, na hivyo wenye nguvu hufaidi katika walio dhaifu. Ukarimu wa Mungu unaangalia mahitaji na kuinua hadhi. Yeye hugawia kila mmoja ili kuhifadhi hadhi yake. Lakini katika ulimwengu wetu wa "mwenye kupata apate", wewe utagawiwa kadiri ulivyochangia. Kila mbuzi ale kadiri ya urefu wa kamba yake. Wote walioajiriwa saa tatu, hata wale wa saa kumi na moja, walikuwa na mahitaji ya kawaida ya kibinadamu. Tajiri wa mfano, akitufunulia sura ya Mungu mkarimu, analitambua hitaji hilo la kila mmoja na anampa kila mmoja kusudi apate haja muhimu za kila siku.
Ukarimu wa Mungu unatupatia kwa nafasi ya kwanza uwepo wake, yaani mambo yote mema yanayotoka kwake, na si katika mali za kushikika au madaraka ya kidunia. Mwenyezi Mungu anataka kuwapatia wote uwepo wake, ukarimu na upendo wake. Watu wanaohangaika kumtafuta Mungu watauonja huo ukarimu wake kupitia mimi na wewe, kwani kanuni ya upendo wa kimungu ni kusambaa kwa wote.
Sherehe ya Jubilei ya Upadri na Utawa
Jimbo la Kigoma limekuwa furaha kubwa kupokea sherehe ya Jubilei ya Upadri na Utawa, ambayo mapadre na watawa mbalimbali wameadhimisha miaka ya huduma yao kwa Mungu. Miongoni mwao, Padre Tryphoni Ndibarema aliadhimisha jubilei yake ya upadri kwa shukrani kubwa kwa Mungu.
Sherehe hizo zimekuwa fursa ya kumshukuru Mungu kwa neema yake kwa njia ya huduma ya wachungaji na watawa, ambao wamejitolea maisha yao katika huduma ya Mungu na waamini. Waamini wamehimizwa kuwaombea wale wote walioweka maisha yao katika utawa na upadri.
Katika misa za jubilei, Askofu wa Jimbo amepongeza wale wote waliosimama imara katika wito wao kwa miaka mingi, wakiwa mfano mzuri kwa vijana wanaozingatia wito wa upadri na utawa. Viongozi hao wa kiroho ni nguzo kubwa ya maisha ya imani ya jimbo.
Tunawaalika waamini kushiriki katika sherehe hizi kwa kuendelea kuwaombea wachungaji na watawa wetu, na kwa kuwakaribisha vijana wanaohisi wito wa Mungu kuendelea kutafuta mwongozo wa kiroho. Baraka za Mungu ziwafike wote.